Home > Boros Kimaragang > “ay” antawa “ai”

“ay” antawa “ai”

September 28, 2011

Nokokito oku dit gama pongija boros kimaragang it sid pompod nopoh nga “ay” om ogumu torongow ku dot osusuwayan dit gama dino. It kenginan kinogumu subai ko “ai“. Yoku kondiri nga irad dino dit gulu. Itungo ku nopo, isai oku mah mantad ko it tulun dit minonimpuun dit pongija irad diri.

Pipiro ot boros posuntuan inono; “kuuy“, “walay“, “togilay“, “sangay“, “wasoy” om pipiro poh. Nitung ku wagu nokuro mah tu irad diri ot gama pongija? Waro it nongokoup daalo dino posotol dot irad dino ot gama poongija kah tu momudali gima dit dang kimaragang kondiri. Okon ko katanud dit poongija tuni sid boros malayu antawa inggeris. Kowosian i boh gima iti.

Sosoroo ku noh, kowosian-i dot irad diri ot gama pongija. Posuntuan, waro gama dot boros “kuuyi“, “walayi“, “togilayi“, “sangayi” om “wasoyi” kah. Ong it poongija nga “ai“, it boros didiri ka dino ot gama mongija, “kuui“, opidsalang dino pouni dit boros “kuuii” antawa ong “kuui-i” kah. Waro dati ot amu songkuro kaarati nokuro tu waro ot boros kimaragang irad ko “kuuyi” kah, iri noh gama dot mongimpatong. Tudungai pogi ilo pituturanan sumusuut.

A: Nunu owoh ad pinggan dilo, kuuy ko tetee?

B: Kuuyi bioboh ilo.

A: Kadung ko kuuyi ilo, tangaso kito.

Kadung noh ko boros dot “kawali” om “kowili” kah om wokon poh, amu noh boh aluk it gama pongija gima ong “kawaly” om “kowily” kah.

Iti boros kimaragang, andang noh ko waro kapaganan dot posurat. Gima, ong tonudon it gama dot malayu, amu i ontok ot tuni, sampod poh ong itanud dot inggeris. Posuntuan, “todung” om “tundundu“. Tuni dot “d” sid boros dot “todung“, olomi, pogi ong sid boros dot “tundundu” kah okodow. Iri noh, it gama mongija dot ontok “todung” ong olomi ot tuni dot “d“, “tunddunddu” kah dino ong okodow ot tuni.

Opurimanan ku iti boros kimaragang nokotimpuun noh dot matag. Monongkotoluod tokow noh sid tulun it nakaarati banar dot linguistic, tu nokopogulu muup om monoguwang dit boros tokow minsan pomah dot bansa suwai yaalo.

Awasi iti gama tidino dot nunu it sid pongitungan tokow, owungkaya siti id internet. Ogumu noh tulun tokow dot kongarati mangatag dot blog. It toon 2009, ogumu kinoruangan kiongo blog, sera nokotiim dot facebook, ogumu noh ot tinumingkod monginwagu tuturan sid blog yoh. Amu-i ko’opod ot blog sid boros kimaragang dara, nga mad okudik noh diri ot popaatod dot tuturan sid blog yoh. Yoku nga alalambat noh diri, nga iti noh amu ku-i iduanan iti blog diti. Orubat it nongokotulis siti. Misan pomah dot okonko olintotok babanar ot gama monulis, mongija om kababarasan nga mogot poh ko aso. Irad ko it boros ku sid tuturan nakatalib, simbanan-i sompoori.

Ong waro okito daton dot opidsalang it gama, kada tokow noh okimat manaak ponginwosian dit kinopidsalangan dino. Ong okon ko irad dino, komoyoon dot tokow-i kondiri ot milolosod. Siombo poh ot tulun tokow kotindal ong irad diti. Miwasi tokow noh om okon ko olosu banar dot gumolok ot ginawo.

Pompusan dot tuturan biano, osimbanan ku dino ot gama mongija sid tuturan dot rumikot. Kotoluadan tu kakali kow magandaa siti.

Advertisements
Categories: Boros Kimaragang