Home > Koomanon Koposiyon, Tuturan-i Baanar > Norualan Tunturu

Norualan Tunturu

July 12, 2011

Oleleed noh aso tabar nakaatag siti id blogku. Minsanko irad dino mimoyo oku dot waro i dikoo ot kopiguguli siti mangakalu dot tuturan wagu. Mokimaap boh iti gima tu nakalandu kou dati dot tumopik siti dit soleled diri. Okon koh tongoh nga, norualan oku dot tunturu om nowiaan potiboroson siti. Mirad dilo bawang tu waro tiya aralom ot weeg, waro nogi ot arasakan. Iti monulis nga kougu i dino.

It tuturan siti biano iri noh it pongitunganku baagi diti media tidino. Kiwaro ot blog, facebook om twitter. Yoku waro blog om facebook nga amu oku noh tinumingan dot twitter. Kowosian dot blog ong yoku, aso pogisaman dot boroson. Ong kakali poh dot waro kenginan tuturanon aso kopidsalangan. Nga ong adarakan kaanaru dot tuturan amu i awasi tu gima kobobos om koruol dot mato mambasa.

Kowosian monulis sid blog, oolud it gama dot boros. Ong yoku, tandayan i babanar monulis tu mangakalu dit ginawo kinoruangan. Mokoyi oku dot waro dati masansala ot boros kaatagku siti. Iri noh tu, toyiponku poh le’ed, induwo intolu basaan, ong waro simbanan nah simbanan noh boh. Minsanko irad dino, payat dot riniba i iti, waro i dati dikoo ot nopokorualan dot ginawo gima dit nongokotulisku sumala ko sid Mogoron Kimaragang, Suara Anak Marudu (SAM) antawa Facebook. Kaa dino, aso i sid ginawoku dot monotomod daraai momokoruol dit ginawo dikoo. Biano, ong waro poh ot kosianan dikoo sid dogon, nah mokimaap oku noh boh.

Tumopik sid facebook, gisom ponolidukan nopo iri kakah, nunu ot komamanon dit pongitungan kinoruanganku. Iri noh tu okudik i ot potiborosonku yoku sid facebook. Popoogol dot boros sid facebook, ong amu atandayan, aso gisom dot ososol. Ogumu noh boh ot tulun dot neekuman gima amu kokodos moros-boros antawa patanjag dit tongo gambar kembubuar koruang ko it kondiri yoh sid facebook. Iri nogi ong yoku induwo intolou i dot mongitung nunu ot boroson i ogol sid tobon dot facebook. Ong amu engin dot opokian, kada noh boh kapapaki ot boros. Ong amu engin dot olimut, kada nogi mongolimut.

Twitter? Aso akaunku diti. Iri noh aku kaarati manaak dot boros nunu ot kowosian om karaatan diti twitter. Aku noh tumingan dino. Kikiawi dit media dino, awasi ot tomodon daraai, nga ong amu opusus ot linasu ginawo, kopiraag noh boh. Isai tokou nopoh tingkadan noh dot miindaraat pogi. Momusorow noh dit awasi om kowosian sid kinogumu, kaantoh noh ong sid kinoruangan Kimaragang.

Tupono: Miandus, misamod om mitoluod tokou noh.

Advertisements