Archive

Archive for July, 2011

Lunggungon

July 27, 2011 Comments off

Waro kakah ot tuturan sompusasawo. It kusai wongoon babanar dot kukuro poh ot gama momogos sawo yoh dit lunggungon (amu korongou) gisom mituboyo poh dino dot asakatan dit pakakas ponginangaan sid tolingo.

Sambat noh kabarasan diri it kusai sid duktur tolingo. “Oi duktur, lunggungon oboh it sawo-ku, nobobos oku noh momogos om mongolokut dau dot mokisokot dit pakakas ponginangan nga amu mituboyo. Tudukai oku poh kah kukuro poh ot gama momogos dit sawo-ku, oi duktur?” kah dit kusai.

Simbar noh it duktur tolingo. “Oh amu-i apagon toh ino oi aman. Ka dino, umbalan-nu mongoduat dit sawo-nu mantad sid kinagayaan dot walai, ‘daling, nunu mah rinapa tokou biano?’ kantoh. Ong amu kosimbar, insomok noh sid lalawangon dit ropuan om mongoduat noh wagu ‘daling, nunu mah rinapa tokou biano?’ kumembagu ong amu kosimbar, sumuwang tantu sid ropuan, ugu om irad mongoduat noh wagu. Nga ong amu-i kosimbar, toning sid talad dit sawo-nu om mongoduat wago, ‘daling, nunu mah rinapa tokou biano?’ iri noh ong kosimbar nogi elaan-nu noh gama momogos dit sawo-nu supaya subai asakatan dit pakakas ponginangaan.”

Uli noh kabarasan it kusai sid walai. Mikunama dot mintingadau noh, okitanan yoh noh it sawo dau sumuwang sid ropuan dot mangansak. Nosorou noh dit kusai it boros dit duktur, asarajat boh dogimah it kusai momoros mantad sid kinagayaan dit walai momoros dot “daling, nunu mah rinapa tokou biano?” kakah. Aso simbar norongou, ongoi noh it kusai sid lalawangon dot ropuan om pongoduat noh wagu, aso-i simbar norongou. Suwang noh sid ropuan om pongoduat noh wagu nga ugu om irad, aso simbar norongou. Toning noh it kusai sid talad dit sawo yoh om pongoduat noh wagu, “daling, nunu mah rinapa tokou biano?” kakah. Ralangai noh dit sawo om pomoros dot “ai lunggungon koh baabanar diti, kenggapat-ku noh sumimbar dikau dot SINALAU TAMBANG ot rinapa oboh!”

Tuturan dot nawawal baanar iti sid internet om tinuturan-ku wagu siti, nga opuod om otulut banar ot komoyoon. Tandayai tokou noh pogi dot moros-boros tu, isai suul kerad-irad tokou di-aman sid tuturan didiri, lunggungon kabarasan it sawo yoh dot it kondiri-i ot lunggungon.

Categories: Tuturan-i Baanar