Archive

Archive for February, 2011

Sabat Poh Om Nokopisingud

February 15, 2011 Comments off

It tadau ponginkayadan toon wagu dot kina nakatalib, minongoi okoi sid Sepilok Sandakan. Waro 6 jam papanau dot kurita mantad sid Tawau palaga sid Sepilok. Awasi it komanon dot pomogunan tiya diri, aso ot darun.

Kopongo okoi mamarai dit intoronon, tilombus okoi noh sid restoran mangakan. Minimamantok tadau diri it sanganu dot restoran minangarawat kaakanan mintingadau isai-isai it korikot siri, tu kina bala it sanganu dit restoran. Nokosiwat okoi poh boh diri dot momoros “Kong si fa chai” sid sanganu dit restoran.

Nakaakan okoi poh, nidoropi dagai noh it riniwot yah sid suwang dit intoronon yah. Waro mosomok jam 3 iri, pamanau okoi noh sid rinantai ponimpanan dot kogiw. Mongingkosup pineyaan monumad dot kogiw. Ades oboh gimawat tongo tanganak ya otomon gisom amu opusus dot kumondiri mamanau sumogulu. Neduan oku diri daalo.

Pagka tu otuyuan oku mamanau sid binantaran ot wayaan, mikokowili oku diri mongombiri om monoyinu dit susumuni om tongo dupot. Timbaan boh bala sid pinongogompian dot kogiw id Sepilok. Tiya ku mamanau, nokikito ku noh iso baanan dot kara.

Bogiyakan it tongo koonduan tumalib tu rumosi mokoyi takaman dot kara saramaan ku iri. Intoron oku noh monoyinu dit baanan dot kara. Sogina dit baanan dot kara, waro iso ot olulundu, kakalu iri noh ot woyoon dit kara. Agayo ot koyuwan, apapag poh om elaan dot kusai tu palambabok it tontoluw yoh dot okitanan. Mususuut sid tori yoh, it tanak, soriliyan nogi dit kara tongondu dit ongoragang it pakou. Ong tuturan sid National Geography, mamaa kabarasan ot kara tongondu ong rumagang noh ot pakou yoh.

Sid sawat dot kayu om sid minsorili dit baanan, kara dot kusai monoliduk om mananggom dit baanan yoh nunu kelelo waro ot araat lumaga. Iri noh ot impurasan ku babanar it tanak dot kara. Korurunan boh gima it buatan tu irad ko aso ot ikorosi. Mingtundak, migogol om migugusa sid tana dot mususuut dit woyoon. Nobobos oku monoyinu, kowili oku noh sid gulu dot lumombus sid ponumadan dot kogiw daraai. Aso kinokowilian ku om nokosunsurut oku dot sabat poh om nokopisingud okoi dit kara sid talad ku balai iri. Okon ko tongoh, tinanggaman oku bala diri dit kara maananggom  baanan yoh.

Categories: Tuturan-i Baanar, Winangun