Lawa Tiningkawa.
Lawa diti okon ko it alanji ot komoyoon. Tiningkawa nga okon ko aakanon antawa ngaran. Lawa dino komoyoon dau it tali ot minaan piogoto it sid somputul yoh. Kadungko mangan intawangai it piniogot, iri noh komoyoon dot tiningkawa.
Kogunaan nopoh dot lawa nga panabpo dot dupot. Koubasan mari, pataanon sid solug it lawa dino. Kadungko tumalib nopoh it dupot om musuk sid lawa, kosulung dino it tulu om aagatan it liow. Nah, naanu noh dino it dupot.
Waro poh it lawa dino poogoton sid pompod dot logodon. Iti noh it reetan dot tawos. Sera mangan undaa it tawos, it tali ki lawa mangan dino tingkawaa om pataanon sid awayaan. Sera tumalib it kuruwak, olakan dino it panakas dit tawos, modtui dino dot aagatan it takod yoh. It tawos kisulung noh dino dot kuruwak.
Kakali andamanku it insan oku nogi lumiyuw pataan dot tawos. It pinataananku dit tawos sid piras dot lolobuon. Sororuruai, kakapon ku it tawos. Nunu mangan, asadaian mangakap nga aso sulung. Susuwab, mosomok mintingadau om kinakap ku nogi it tawos, nga boh nawakas, songinan ot kuruwak malantaid sid logodon. Otomon, om aso tingkod dot kusum, mokimoyo poh dino dot moleeng tu elo diri kabarasan pataan dot tawos.
Tupono: Tandayan tokou milimpanau siombo nopo, nunu kelelo kosulung dati dot tawos pomogunan.
Mogoron Kimaragang 
alanji iti tajuk diti sorita nu pinsan…nga porotiyo oku po nunu ka komoyoon dat solug, logodon, undaa, om lumiyu dilo?
Solug = ralan dit awayaan dot dupot
Logodon = kayu antawa poring it ponoko “spring” dit tawos
Undaa = gama posodia dit tawos supaya ong otingkau nga makas
Lumiyuw = amu poh elo, mumbal nogi dot mangagama
Mene’es oku nogi, kosuwang ko amu iti borosku.
Terima kasih ot togumu kumaa sid dikau.
Yoku nopo diti amu insan momoros dot kimaragang kumaa sid tama, tidi om tongo tobpine’a ku wokon. It tidi ku gima kon ko bangsa poh do kimaragang nga kimaragang tulen boyobo it tapa ku. Jadi, mantad dit kosusu miapai tidino, a’akoi insan momoros dot kimaragang it yoyokoi. Malayu ot pamarasan dagai sid walai mantad poh id tanganak poh sampai tidino it nongosukod om kiongo tanak-sawo okoi noh kiawi. Kelo-elo kunopo momoros dot kimaragang nga mantad sid tongo koruang ku it tanganak akopo. Tu kogumuan po tiya diri ( toun 1970an-1980an)momoros dot kimaragang. Jadi mantad id sid koruangan ot kelo-elo ku momoros dot kimaragang.Jadi, uli sebap dot, id tongo koruang i ot minonuduk dogon boros dot kimaragang, nga nountung oku’i tu ogumu i it wokon korungku bangsa dot Sama(Bajau). Nah, sabanar nopoh nokopogulu okupoh momoros dot Sama om keelo oku nogi momoros dot kimaragang.
Aalambat oku mongumin iti sitid blog nu nga, asasaro oku’i mangabaca tu adapat dot mangaralom banar itid pomoros dot kimaragangku.
Tq.
Nosulungan oku yoku mari dot mandaatan tiya minanawos sid botung daton di muula. Hehe…
Tobpine OngkilanKuranji,
Kotoluadan dit kinorikatan nu siti. It kelelo nu momoros dot kimaragang awasi it gama, komoyoon ong kumosog noh lumiyuw momoros kimaragang, leed kelo i dino. Ilo noh, yoku ambaton-ambatonku ilo tanganakku momoros dot kimaragang. Otomon oku kinorikatannu siti. Pususo tokou noh iti boros kimaragang tu mikikijom noh iti.
Bro Ison,
Ai oboh, agayo ot sulung nuh yika bala dit insan koh nogi pataan dot tawos boh. Nga miabal i dati it pomurimanan sid ginawo dot osulungan it tawos sera mangakap.