Archive

Archive for September, 2010

Lawa Tiningkawa.

September 30, 2010 6 comments

Lawa diti okon ko it alanji ot komoyoon. Tiningkawa nga okon ko aakanon antawa ngaran. Lawa dino komoyoon dau it tali ot minaan piogoto it sid somputul yoh. Kadungko mangan intawangai it piniogot, iri noh komoyoon dot tiningkawa.

Kogunaan nopoh dot lawa nga panabpo dot dupot. Koubasan mari, pataanon sid solug it lawa dino. Kadungko tumalib nopoh it dupot om musuk sid lawa, kosulung dino it tulu om aagatan it liow. Nah, naanu noh dino it dupot.

Waro poh it lawa dino poogoton sid pompod dot logodon. Iti noh it reetan dot tawos. Sera mangan undaa it tawos, it tali ki lawa mangan dino tingkawaa om pataanon sid awayaan. Sera tumalib it kuruwak, olakan dino it panakas dit tawos, modtui dino dot aagatan it takod yoh. It tawos kisulung noh dino dot kuruwak.

Kakali andamanku it insan oku nogi lumiyuw pataan dot tawos. It pinataananku dit tawos sid piras dot lolobuon. Sororuruai, kakapon ku it tawos. Nunu mangan, asadaian mangakap nga aso sulung. Susuwab, mosomok mintingadau om kinakap ku nogi it tawos, nga boh nawakas, songinan ot kuruwak malantaid sid logodon. Otomon, om aso tingkod dot kusum, mokimoyo poh dino dot moleeng tu elo diri kabarasan pataan dot tawos.

Tupono: Tandayan tokou milimpanau siombo nopo, nunu kelelo kosulung dati dot tawos pomogunan.

Categories: It Elalaan Tokou