Archive

Archive for July, 2010

Tomporusu.

July 28, 2010 1 comment

Okuratak tuni weeg lumuyung sid tomporusu. Okirow poh dot otitiw winawau tadau it lumopuson sid pialatan dot roon. Atamis opurimanan sid sosondoton kitomporusu, gima osidung dit titimbaan. Nontodon dit weeg lumuyung sid tomporusu iri noh towud dot paluw sid sokid. Wokokon it paluw sid singkag dot monimung dit weeg om saawan nogi dot linapak tumbalang. It sapad dit tumbalang mangan iduo supaya it weeg aso kotobon lumuyung.

It weeg tumiri mantad sid tomporusu saawan dot sanggan. Sookon it weeg om ituntug sid tulu, osogit nopoh opurimanan oluyungan ot koyuwan. Mungkodom momurimon sinogit, it kakarog dot koyuwan. Siri noh ot popodsuon om panagaan. Opurak ot kulit okonko kibulita, nga nopulangan dit weeg sid tomporusu. Aso orualan dot tiyan monginum weeg sid tomporusu tu aso tobung it osomu.

Ong biano nosimban noh it tomporusu. Kawaya kosimbanon dot pomogunan, it tomporusu kosuwang noh sid walai. Nga okon noh ko reetan tomporusu, paip diri ot pinomungaranan. Tadau-adau modsu tokou id tomporusu dara, nga natanus noh sid panambarasan tanganak it tomporusu.

Lumangad oku modsu id tomporusu, nga aso noh ot tomporusu irad ko it nendananku gulu. Sampod poh diri tidino, aso noh ot timbaan. Alangkas it weeg rumasak mantad sid tana tu osikiranan banar dot linasu tadau. It weeg lumuyung sid saralom dot tana, amu noh mimbulai sid towud. Aso noh weeg lumuyung sid paluw it awasi poluyungon sid tomporusu. Osian i aman om inan sid kokol, niasan poh dot tanganak mogiim koposiyon sid malaya, narasakan poh dot paluw. Aso noh weeg lumuyung om tumiri sid tomporusu yoh.

Mirop-kirop i aman dot mosondiw sid lalawangon mintungangis, monosorow koposiyon. ‘Nunu mah karaatan yah diti, niasan poh dot tanganak, narasakkan poh dot towud, om aso noh weeg lumuyung sid tomporusu yah.’ kah di aman sid ginawo. Osogilitan poh dot bulita i aman tu alambat noh kopodsu, landu osodu it bawang sondoton dot modsu. Orikot poh mah it bawang nga kasarakai olitok it weeg. Mikod-ikod poh i aman om asarok nogi orualan dot tiyan. Mongoi mokiubat sid walai pokiubatan dara’ai nga osodu dot mintana. Rusap tungkusan mantad komoleengan apagon noh mogiim, gima nopunso noh ot timbaan.

Monosorow i aman, isai kah ot toronongon om isai kah ot pokimamaan. Kinoringan it minamangun poh ot osorow yoh. Gimawat di aman, susundui poh waro ot kosianan mantad sid sosondion dot pomogunan, gam onuwon nogi it koposiyon yoh dot kererakan.

Iti noh wokon koompuson tulun tokou ong aso noh pisompuruan dot ginawo. Tumanus it tungkusan gulu, oliangan dot pongintutunan om katanud poh dit tuntuduk dot wokon. Aso pangandaman om pomusaraan dit koposiyon om kengkakatan tulun kondiri, gimah it ginawo nasakatan toruol moginokupan.

Advertisements
Categories: It Elalaan Tokou