Archive

Archive for September, 2009

Pinalid Dot Tutumolong.

September 28, 2009 2 comments

Tuturan komolengan it keran-iran waro kabarasan ot reetan tutumolong. Tutumolong nopoh diti nga keyeyo dot tulun nga it kogoyoo yoh mirad noh dot tanak kitumur 5 noh toon. Iyonon dino tutumolong kabarasan sid timbaan. It opurineyan tulun kodori iri noh kosambat okodok ot waya dot tulun sid piras dot bawang. Iri nopo kabarasan nga waya dot tutumolong.

Amu elaan atalang dot kiwaro ko aso iti retan dot tutumolong nga it toon nakatalib, waro ot kuango (tengkorak) nasambat ponong sid pomogunan dot Flores, Indonesia dot tulung tokodok kougu-ugu diti retan dot tutumolong kogoyo kopurimananku nga nopunso noh kabarasan ino bansa tulun tongo koodok dino maya tuturan tongo saintis.

Kobasan mari ong it tanganak oku poh, rasangon okoi tongo moleeng milimpanau sid somok timbaan dot iseso tu mokoyi polidon dot tutumolong.

Waro ot tuturan babanar sid Longob, sandad yah it tanganak poh pinalid dot tutumolong, kakah. Tomodonku dot amu pentalang dit ngaran dialo siti tu milo poh om rasangon oku dialo.

It okodok poh, iti sandadku nasadayan nangku iri dot noleong. Iri no boh isai moleeng amu sumusa ong oliangan dot tanak tokodok. Minongoi sid bawang Longob kabarasan yalo dino dot kokondiri. Keelaai poh dit tidi om aso noh sino. Nunu poh kikiawi tulun sid kawalaian nga minabpanau noh mogiim dialo. Nunu ot maan amu nokitanan.

Iri noh kabarasan, pinalid tutumolong it tanak diri kah dit iso om duwo. Gama popooli iri noh maan totoso mongiloow it ngaran sid lonjong kabarasan. Ha..ha..ha… ogumu telalan toboh iti tongo moleeng tokou.

Minsosodoi poh, waro noh tulun mantad sid sarayo dot Longob nokooli om med manud-tanud dino it tanak dit noleong. Tuturan dit nakasambat dit tanak, mogom-ogom kabarasan it tanak sid timpak dot pampang id bawang. Neranan tu nunu maan dit tanak diri seso. Nah lowo diri kabarasan nga, modtui sinumulok it tanak, gusaa diri om tabpai nga kapapayaan momusus tu alamou kabarasan diri it tanak dino.

Kadung natabpaan noh na minaan diri paakano dit nokokito. Amu noh minangakan it tanak tu nowiyau noh kakah dot tongo gipan ot rinapa kabarasan. Duato nunu minaan sid sarayo, waro tatanak minangangat kabarasan. Kadung nokoli diri sid walai, nah otomon noh boh dino it tongo tulun kikiawi. Iti noh tuturan norongou ku mantad sid tongo tulun om tidi dit sandadku.

Sera nagagayo okoi om sid sikul noh, tinumingan oku i dialo mongoduat nga iri noh ot andaman dialo, waro ot tatanak minangangat dogon, kakah.

Tupono: Kopisuwai noh it maamalid tidino om it kodori.

Advertisements
Categories: Tuturan Komolengan