Archive

Archive for July, 2009

Kinomulok.

July 31, 2009 6 comments

“Sundu-sundu ku kinomulok

Tondu ko mantad id Kayangan

Tondu ko mantad Rumandawi

Do royohon tulun id riniba”

Ong osorow poh daton iti lalanu di Masni Sumiran, ngaran tantu i ilo Kinomulok, balaai.

Nga ilo, sid boros dot Dusun Liwan (boros dusun potongkop Ranau, Kota Belud, Tambunan om Keningau).

Sid boros dot kimaragang, kinomulok nopo nga suwai noh ot komoyoon.

Komoyoon nopoh dot kinomulok sid boros tokow, iri noh it reetan ‘tapai’ kah ong sid boros malayu.

Oomis mari kaakakanan dot kinomulok.

Osorow ku poh it muula sera posidang i mama dot liob (ragi), elaan ku noh dot manasad yino.

Om kooli i bapa mantad sid taras, kiowit roon dot buntui nah, aso noh ot imamanon poh nga andangko manasad i mama.

Sosodoi poh, rutaan noh di mama it liob gisom osiliw dot tapung.

Kadung kopongo okoi noh mangakan dot sodoi, mangarakan noh kembagu dot takanon i mama.

Ansak nopoh, pakayason dino it takanon sid nowoogan ot rilibu.

Kadung ko atamis noh it takanon, rowusan dino dit rinuta dot liob om pigowulon nonoh.

Opongo popigawul, lopoton nogi dit roon dot buntui om paatagon dino sid saging.

Koduwo tadau poh munsayub noh ot tawau dot kinomulok.

Otomon boh ong tanganak, mingtundak okoi nopo siti silo kadungko momungkaya noh dot kinomulok i mama dit muula.

Nunu ot amu otomon, oomis babaanar ino kinomulok om awasi nogi kaakakanan.

Nga, asadaian noh kawasa akanon, ong katalib noh, rasangon okoi noh dino mangakan tu kaawuk, sumiliw dino dot kombos it kinomulok om tumimpuun noh dot opeet.

Iti noh ot andamanku retan dot kinomulok sid boros kimaragang.

Tupono: Kotungkus tokow poh kah dit elalaan kodori?

Categories: It Elalaan Tokou