Archive

Archive for June, 2009

Tongondu Sinogiton Nokuriliban

June 29, 2009 7 comments

‘Ai nokuro iti totongondu ti tu mitinalib, kaakatuk ong amu poh nasambat dau it oogomon yoh.’ kah dit ginawoku. Nga aku i impurasaan baabanar boh. Nga ugu om irad diri tu kaakali mitinalib. Sera dot nongokodoropi noh kikiawi it wokon om rumikot noh it pamanaan dot bas, milo poh om minunsayub ot aangod sid todungku. Pagka tu oyan oku, pongkodom oku boh mogom-ogom dino, nga noringkaw it pongitunganku dot waro minunsayub. Ungkalat om kowili oku, nunu ot maan owoh, it totongondu dit mitinalib bala diri, sid taladku bala ot kinoontokon dau dot mogom.

Kusai oku noh dot nopongo boh dogima tiya diri, iri noh tu minongimpuros oku noh dit totongondu. Kokowili do yino, na nokopisimbar ot kusum ya. Labaa ko asasab kah di Illie mari hi.. hi.. hi.. (kada rumasang ki Illie, sokurang-kurang sastera nopo ilo).

Mamanau noh diri it bas, nga kakaali aso tuturan yah. Oleleed, oyongow banar om osogit nogi id suwang dot bas. Kowiliyoku kembagu, ades sogiton baabanar okitoku it totongondu. Aso nogi ot longon dit baju yoh. Yoku diti amui baanar sogiton tu atantu i ot baju om ki jeket poh.

Minimbulai diri it kosianan sid ginawoku. Olusoku noh it jeketku. “Excuse me, saya lihat kau tidak sihat, nah pakai jeket ini.” kangku med dot pinotunui dino. Morolong dogon diri dot notoodan dati iri. Pongingkusum oku noh. Pongingkusum noh do yino. “Sejuk betul bah dalam bas ini. Kau macam mana?” kakah sinumimbar, dot araraatan boh dati iri mangaramit dit jeketku. “Baju saya ini agak tebal juga dan masih dapat tahan.” kangku diri om kakaali oku potunui dit jeket. Kaakalu dot amu do yino kasagka dit osogit, rinamit noh dau diri boh.

Ba, mantad diri ogumu dino tuturan yah. Malayu pomiboboros dagai mumula nga sera dot nokopitarang, sompi Kimaragang okoi i bala diri. Na nunu poh, erus okoi diri baabanar minituturan. “Siongo oboh ot ulion nuh dino?” kangku. “Siombo ot kampung nuh dika?” kah nogi sumimbar, ponokukusum sumirot dogon. “Sid Longob.” kangku noh sumimbar. “Oh, kopitoning i ot kampung dito diti.” kakah dit totongondu minomoros. “Isai oboh ot moleeng nu?” kangku noh. Simbar dit totongondu “Araarat dogon ot tama.” Sid ginawoku ‘Ai nokuro iti’, “Okukuro i ot moleeng tokow, amu awasi boh dot pakaraat daalo.” kangku diri. Iri noh tu niboros yoh diri isai ot tama yoh. Otutunanku i boh dogima it tama dau, nga aku i intalang siti, ‘biarlah rahsia’ kah dit lalanu di CT mari.

Mituturan okoi diri gisom nakalaga sid Bandau. Sera minitotongkiyad okoi, na minonorimakasi noh boh dogima tu nokopongingkurilib dit jeketku. Kooli oku sid walai, mituturan okoi diri di bapa. Nakakalakak i bapa dit tuturanku.

Susuwab kinoulianku sid Longob, milom tu okitananku diri mitinalib it totongondu sid talun-alun. Nopulid poh it tadau orongow kunoh ot bongut “Indakod i oi!?” kakah. Toronong oku noh sid lalawangon, nunu ot maan musum-kusum it totongondu sid tukad. Ba, “Indakod.” kangku diri boh. Misirot okoi di bapa om musum-kusum yaalo dot monorulu dogon, na oleed okoi mituturan boh diri, tumonob noh it tadau om minuli nogi.

Ai kangku dino, oboh diti, sabat poh dogon. Awasi tu aku i baanar olonduk do yoku. Aku dino elaan ong olonduk oku noh oboh diri. Illie, kada mongingkalakak sino, ha..ha..ha. Uma poh iri.

Tinomod ku noh dot amu atarang isai yino dino siti, ong kokiraai om waaro dikoo nokelo diti tuturan, kadada kow, simbar kow i nga kada nopo iintalang isai yino dino, osian oboh.

Tupono: Tandayan boh potunui dot kurilib, isai suul waro gumusa.

Advertisements
Categories: Tuturan-i Baanar