Otoron Oku Noh.

Kotoluadan dikoo kinoruangan dit nakalaga om minintungangis siti tiya nopoiganku. Pikakapku i boh iti blogku nga, pitolibanku iko tu adarakan magaago kabarasan. Awasi tu nokorikot i Pinsan Mimie pinalasu dit tinopuru siti (kotoluadan dika pinsan). Nga siombo poh kah naawi noh it tinopuru, ningkuor dot tusing dati owoh iri.

Mangaiku kakapo it waro sabat-sabat nakaasok ku, nunu maan owo, mingis-kingis bala’ai i Pinsan Pia mongompuri om meed poliyuw poh dino dit tanganak yo dot mongompuri. Nga aso i boh karaatan diri, awasi nogi iri. Gaam poh waro minongompuri dit parai ko tinubpaan poh dot pirit.

Sompi duduat kow dati dot siongo kinopoigon di Mogoron diri. Iri no boh, kadung ko ‘makan gaji‘ noh ot orotian, ogumu no isusuu. Nga awasi tu it isusuu daalo dino, mongowit i dot kowosian sid sompomogunan. Linupuon om nooyanan it guwas om pongitunganku saralom tolu minggu diri. Iri noh tu oleed aso tuturan wagu siti, amu mamanau it pangandamanku manaak tuturan siti id blog Mogoron Kimaragang.

It songkoniab, kinuminam oku sumombol sid blog kinoruangan nga boh ogugumu noh ot nopurineyanku. Waro noh ong alasu sapi om wokon nopo nga ki rugi poh ki tapui poh it boros. Nga posimoyoon i biobo yaalo dino okonko totoyoon, aso pialatan dati ong tumoyow noh banar.

Iti toboh sid blog diti minsanko amu kopitomumung ot wuros, wosion tokow noh monomboros. Miabal i dot sumombol oboh sid walai komimiyo iti siti id kawalaian dot blog. Iri noh isai-isai ki blog, potilombuso tokow it tuturan awasi sid sandad om koruang, lalabaan poh dino ong sid moleeng tobpinee kondiri.

Ai, nakaalai oku diri bala diti dot tuturan. Ba owito ku poh ikoo id pangandamanku sid gama tokow gulu mutanom dot parai. Posunduran dit tuturanku “Maganak Poh Om Monontiyan Nogi”. Amu songkuro koleed dot muonsi it parai, sumilow noh dino om mangarawat noh tongo tulun dot linggaman.

Ong togoron noh it linggaman, asaaon noh dino. It maamal dot linggaman, tiya diti noh ot lumaku it linggaman daalo. Ogumu boh ot kobubuatano dit linggaman.

Sera tumakub dot mongomot orulud nopo dino sampaganakan dot mongongoi dit rawo om songgolon dino. Kadung noko amu noh osonggol, potodon dino sid pataan. Ong amu songgolon it rawo, modtui isuwang dino sid pataan tokodok it sasandangon. Oponu nopoh it pataan, potuntugon dino it rawo dot parai sid saging.

Isai it apapag nah yino noboh dino ot mamabo dit saging om popatod dino sid tangkob dot walai keno ong sulap. Nokoombal oku mari mamabo dot saging mangakut dot parai. Ong it tumimpuun nogi dot mingkakat boh  kumikip mari ot totud ki dot monunggor koyuwan, tiya diri 16 toon oku nogi.

Waro insan tadaw, sera dot induwo intolu noh miguguli mamabo dot saging, pamanau oku noh sumunsui dot sibor, kakalu dot nooyanan oku no dati diri, nokotongkisal om nokosumpak oku nga boh, oleed oku momuomu dot norualan.

Nga biano poh, kambain diri kikiawi ot pongomot. Kawasa boroson makaa dot mangaramit poh dot siin pongosilan dit parai yoh. Awasi boh dogima, nga ong it apadat dot mooginum, amu owit sid walai mari ot siin ki, aawi dot moginum. Nunu i tanganak yo, momorolu darai dot siin balanja sid sikul.

Andang no boh dot koobasan tokow ot monginum dit kaawuk, nga subai ko ki gisom i. Sukupon poh it koporoluan sid tanak sawo oboh om ong waro ot olu-olu, aso i karaatan dot tumiim nopo kada poh dot manangas.

Tupono: Kalangad it gama mongomot dot parai dit muula minsan ko asansara it kakaakarajao yo.