Archive

Archive for May, 2009

Rumilit Papasut Tondulupang.

May 27, 2009 6 comments

(Tuturan tanaru dit “Okon Ko Padarakan” sid blog SAM)

Minaalan oku daraai dot mundang dit tuturan kinoruangan id blog SAM pasal dit gama mangaatag-atag dot tanak. Okon ko aso ot opurimanan oruol sid ginawoku nga, nadarakan oku. Tadpoh om aku asansaran mogigintong it towit di Aman Aldusuni sid blog SAM. Ogumu boh ot ososorow om asaranau dino id pongitungan kokito dit ragang minaai uguo diri.

It tidi ya dit miyau poh, orongit i dagai om monigup nogi. Minsan pomah dot irad diri, aso nopurimananku dot monigup nopo it tidi ya om momisok nopoh dit lumbidan yoh nga potodoson sid koyuwanku. Aso nogi nokitananku irad dino ot gama yoh sid tongo tinoriku.

Ong rumasang dagai i bapa adangko oposutan okoi. Nokopurimon oku dot papasut dialo gisom nokoburok it raa sid bulud ku om tiningkadan oku nogi mamasut. It kinarasangan dialo dogo, tinumanud oku tanganak dot amu rumikot id sikul, kadung muli noh tanganak sikul, tumanud nogi dino muli kabarasan, nga nelaan oku tu waro koruang pinoruput. Jajara dogon tiya diri boh. Minsanko irad dino i bapa mangatag dagai, amu insan dialo pasandatai it tulu ya dot linaas suduwon gisom karaa om aadan okoi.

Kadungko mogirompus yaalo minduduwo sid isai-isai dagai, amuso ot boros dit kapaapaki, amuso ot boros kentutulus om amuso ot boros dit kopokoruol ginawo dot tanak. Sera dot ataatamis noh it ginawo daalo dot rumasang dagai, ongoyoon okoi noh om ataatangon noh dino. Gopuson okoi om poorotiyon okoi noh dot nokuro tu rinasang okoi.

Waro ot aandamanku dit tidiya pasal diti, insan tadau dit onom toon oku nogi, waro nisuu dogon popatod dot tayad sid toduku. Kasasalaan aku nawanayan siongo ot paatadan. Modtui noh rinamitku it itayad om pootodo ku noh sid sombol tosoomok. Kelaai di mama tu oruai oku banar nokoguli, rinumilit boh ot tondulupang nipasut sid buludku. Nokuro tu amu momuruwau mogiad. Panangkus oku noh diri miad-iad sid sombol mongongoi dit tayad om potodo ku noh sid toduku. Awasi, niatag poh dit sombol pinaatadanku it tayad tu neranan dit miuma noh iso tulun it tayad dino. Id polian ku, mingut-singut oku om kendakod sid walai ongoi oku noh sid sunduk minimpipit siri dot kakali mingut-singut oruol ginawo noposutan.

Kokowili oku sid lalawangon dot ropuan, okito ku noh i mama mamanau tumoronong, tadpoh om aku elalaan diri it kondiriku tu rumosi posutan wagu. Manangkus nga aso wayaan tu sid pipit. Na, nokolondui oku kembagu boh om iriri poh ginapusku it takodku om mongindad dot pasandatan kembagu dot papasut. Nga, kalaga sid somok i mama, kuyutai noh it longonku med dot otutuyuan mongogodong. Ingkakat oku om modtui gopuso oku noh dau dot monginsasamod. Milo poh om sompi lolondui okoi diri dot mogiad.

Kosusaan pempasi mari ot kotondos wokon nokuro tu taganak ot polobusan dit rinasangan dot moleeng. Osusa boh kopoposiyon dagai dit gulu, kiroo i gisom mindamo poh dot tampasuk sid tulun om tuntu tampasuk poh ot korinapaan. Minsanko osusa ot opurimanan ya aso dagai songobpine dot pinadarakan mangarasang di tama om tidi yah. It toruol sid koyuwan dot pinosutan, amuso ot mogol, mitaalib i. It kowosian di bapa om mama minongopud dagai kobulun oku momoros dot ogumu om ki sundu poh tu gisom kolingos dit toruol papasut om ginawo yah.

Sera kianak oku noh diri, nokoombal oku rumasang dit tanakku om nakalandu posondot it paladku sid solot yoh. Oruol banar sid ginawoku om ososol oku gisom irad diri ot gamaku rumasang dit tanakku. Oleleed diri, pomoros noh i bapa dot opian ot gama, “okon ko padarakan pogi rumasang dot tanganak” kah dialo. No o ku nopoh yaalo tu norotiyanku noh dot nadarakanku sabat rumasang tiya diri it tanakku. “Irad koh noh dialo oboh ot bubuatan nu dit ugu koh nogi dialo” kah di bapa wagu momoros dogo. Tinumuku oku nopo diri tu nokerasa papasut sid ginawo.

Na, it tongo tanganak diri, keemamatan dot tulun norungadan, madko aso ot ororotiyan boh. Pogi ong boros dat pongkaji dot “psikologi”, nunu nawayaan om nunu nososomitan tiya dit tanganak poh mantad sid gama pomiara dot moleeng sid tanganak yoh waro ot koompusan dino. Iradko ong opibobog, entulusan, opokian om sino ngawi noh ot boros dit apalui it gama pangarasang, it wokon poh osorisid it boros taraat kobubus sid tanak yoh gina dot padrasang. Sompoori, agayo it tanak dino, monokiduntung, maanabug, okonko gigina ot korompus, potiboroson nga nunu it nokotuntug dit moleeng yoh osorisid i kikiawi dot mimbulai om kalalaba nogi dino tu “zaman moden” noh dino gima iti. Osian oboh ot tulun irad diti.

Isai nopo amuso ot engin dot araat poh koompuson dit tanganak yoh. Iri pogi engin kikiawi dot awasi om olundus it gama kowowoyoon dit tongo tanganak dino. Iri noh, okon ko padarakan mangarasang it tanganak tokow.

Tupono: Amu poh oliyot banar oku manaak boros dot Kopiwosian Tadau Pangandaman Dot Tidi” om amui alangkas banar oku manaak boros dot “Kopiwosian Tadau Pangandaman Dot Tama” kumaa sid dikoo kikiawi dit opipit monoliduk siti.

Categories: Tuturan-i Baanar