Archive

Archive for February, 2009

Sumako Dot Karabau.

February 25, 2009 6 comments

Pangayam dit ogumu ot kogunaan dot tulun Kimaragang inonoh karabau. Inot karabau dino, onuwon dot panansawo, sasaka’an, pangakut dot barang, pangagama dot botung, pomukas dot lobong om pongorundun dit tulun nosusa (minatai). Pongila’an dot asanang ko osusa ot tulun dit kodori, iri noh songkuro koogumu ot karabau nuh.

Nga iti tuturanku biano diti inonoh, sumako dot karabau. It tanganak oku poh ogumu poh ot tulun sumako dot karabau. Waro i it kinoruangan sumikul id SK Mosolog dit gulu karabau ot saka’an.

Kiawau dot karabau mari ki ong sumako noh dot karabau. Iri noh ong mongoi id gagamaon (botung, gopu antawa sinambak) aso i nununuh ong kiawau kow pomah dot karabau. Pogi ong mongoi magandaa ong keno ong sumu’ung, opipidsalang noh mari ong adarakan noh kiawau dot karabau. Iri noh mari iri tu podsuon poh it karabau, om kadung saka’an noh lopikan poh it solot dit karabau dot kadut.

It gama papanau dot karabau dino waro mari ot pomoros dit orotian dot karabau. Kadung kasako om papanau dino dit karabau posutan noh it pakow dot karabau om med momoros “hiih!” (it tuni maya sid todung) kah dino. Ong sumimpang, godongon it tali do karabau ponong id wanan antawa id gibang om momoros noh “paling!” kah. Kadung ko popengkoyod, godongon it tali om momoros noh “haan!” kah. It karabau dit obas noh banar mari, amu noh oporolu dot posutan, boroson nopoh nga elaan noh dit karabau. Iri-ri poh it sumimpang, ong ponong id wanan simpangon, powolion noh ponong id wanan it tali om momoros nogi dot “paling!” kah om irad i dino ong sumimpang ponong id gibang.

Ong otuyu it karabau, om obas monila dot tasin, pololobuson i mari dot aso ot tali nokoogot id bunsaring dau. Na, kadung waro kogunaan om oporolu dot rokopon it karabau, manganu noh dot tasin insamakan it karabau om i tunui noh it tasin sid palad om momoros “musmus!” kah dino. Tumoronong noh dino it karabau monila dit tasin id palad, mawi poh it tasin, giratan noh dino it bunsaring om agatan noh dino dot tali.

Tupono: Ong sumako dot karabau mari, aso kosusaan dit minsawat ot torogo dot petrol om disel dara’ai, nga isai poh ot kobulun/kasa’ap sumako dot karabau tidino?

 

Categories: It Elalaan Tokou