Mongimpatong Tuni Dot “b” Om “d” Sid Boros Kimaragang.

November 21, 2012 2 comments

Landu koleed dot amu ku nakakap iti blog. It tadaw biano (20/11/2012) nokopituturan okoy dit tama ku kaanangan sid koopudan dot boros kimaragang. Nunu poh naandaman ku noh diri iti blog ku dot oleed amu nakakap bala. Iti noh diri dot okon ko ganta nakakap nga naagalan poh dino dot tuturan wagu.

Iti tuturan biano diti, sumunu dit tuturan nakatalib. Sera dot notuddungan ku it kababarasan om tuni dot “b” om “d” sid boros kimaragang, waro ot amu bala olintotok it gama ku patarang sid tuturan nakatalib. It amu olintotok sid tuturan nakatalib diri posimoyoon noh, apatangan nogi babanar.

It nempurasanku sid boros dot kimaragang tuni tokodow nopo dot “b” om “d” nga irad diti;

1.  sid pompod dot boros (talob, talib, saab, sokid, ukad, takod)

2. kosunu dot “huruf konsonen” (tundundu, tumbalang, kondiw, gimbaran)

3. osunuan dot “huruf konsonen” (tobpine, tobping, podtung, podsu)

Tuni tolomi dot “b” om “d” nopo nga irad diti;

1. ponimpunan dot boros (dungkarow, dang, dot, bulongiw, bongkuris, boros)

2. sid pialatan dot “huruf vokal” (obobos, subo, ubas, todos, todung, tudu)

Kiwaro mari ot boros kimaragang dot it “d” madko sid pialatan dot “huruf vokal” nga okodow ot koniyan dau. Irad ko tadaw, nga sera dot sosonodon momoros, it kontukan mongija irad diti, taddaw, gima kosotol banar mari it huruf “d” gama momoros. Tuni tokodow dot “b” ong sid pialatan dot “huruf vokal” aso poh gima ot neendanan ku dino, amu nogi elaan ong naalayan ku dati.

 

Categories: Boros Kimaragang