Nogonob Sontoon.

Tadau biano, nogonob sontoon noh bala iti Mogoron Kimaragang dot nopudali. Amu opurimanan owoh ot tadau tumalib. Otomon oku tu, ogugumu noh tuturan nakaatodku siti, om tuturan biano diti it kolimonoopod (50) noh.

Biano, manganu oku kosiwatan monongkotoluod diko kikiawi dit nokorikot siti. Opopodonku dot waro kowosian naramit diko mantad sid tuturan siti. Kinoruangan om obpinee dit nongokopongogol dot boros siti, awasi kikiawi iri om koponginwasi nogi dit tuturan siti.

Kokirai ong waro boros amu awasi siti om nakasaad dot ginawo dikoo, olingai noh iri om ondomo nopo it awasi. Makaa noh boh tokou diti riniba, waro timpu amu opurimanan kopomoros tokou dit kopokoruol dot ginawo. Yoku nga irad i dino.

Iti noh, norikot diti blog Mogoron Kimaragang id saralom sontoon, nokopudali dot tumpug tuturan dit atandas sid boros dang kimaragang. Wokon poh kowosian nanu dit kondiriku, ogumu boros wagu naramit mantad sid kinoruangan dit opipit poogol dot simbar siti. It boros wokon aramit mantad sid moleengku kondiri sera kopituturan okoi diti koomamanon dot boros kimaragang.

Kopupuson kowosian, siniliwku iti blog dot bantaran po’obusan dit gamaku mongitung sid boros dang kimaragang, gimah tu aso koruang ponokibabarasanku siti id boros kondiri.

Tupono: Ong kakali poh amu oputut pinuoboku, kakali oku i mongolokut dikoo kinoruangan om sukod wagu kimaragang dot mongogompi om monungkus banar diti boros tokou kimaragang.

Mogombiyau.

Sera misowoli ot putoonan, sino noh korikatan dot gompus. Komoyoon nopoh dot gompus nga amu mikotingkod ot darun. Minsan ko irad dino, aso poh liyud lumaga ong it tumimpuun nogi ot gompus.

Iri nogi ong asadayan om osuwaban asapou banar ot darun om amu mikotodu, iti noh komoyoon dot mogombiyau, kah. Induwo intolu ot liyud sumurung mari, ong ponong sid Bandau.

Sesera kadung noh ko it sid pisowolian noh dot toon, purimonon noh iti reetan dot mogombiyau tu andangko liyud tagayo ot rumikot mari. Iri noh langkasan podoropi dit binurubut dit osingkop dot liyud. Antawa lumangkas mongumpug kosukupan tu nunu kelelo opututan dot ralan mongoi sid kadai.

Kali-ali kow noh kikiawi.

Nelaan Nogi.

Kopiwosian kembagu tu nokorikot kow siti. Tiya suti dit pompod toon nakatalib, mituturan okoi di bapa pasal dot warana sid boros kimaragang. Iri noh it andamanku amu ku elaan sid boros kimaragang it retan “biru” kah sid boros malayu. Waro nogi ot notuturan ku siti pasal dot warana sid boros dot kimaragang sid tuturan “buluntung minimbulai“.

Iri noh ot opidsalang mari it “hijau” om “biru” kah tu it andaman ku otomow nopo. It tiya dot siti diri, minituturan okoi noh di bapa dot nunu ot “biru” ong sid boros kimaragang tu aso norongow ku kangaku dialo. Waro i dino ataruk kah dialo. Iti noh popelo oku siti dot it boros sid malayu “biru” kah ong sid boros tokou kimaragang balaai ataruk.

Tupono: Isai nopoh daton tulun dot kimaragang ong kooli magandaa, dumuat kow noh dit kowowoyoon boros dot kimaragang sid moleeng antawa tongo memeleeng.

Nokotopik Sid Putoonan Wagu.

Nakatalib noh toon 2009, om nokotopik tokou noh sid toon 2010 biano. Noruangan noh dot lineed it koomamanon dit boros tokou kimaragang sumintor sid bansa tokou kondiri. Aso ot gama monukud gisom kogulianan dit bansa tokou mongogompi dit boros kondiri. Amu ku nogi elaan banar siombo noh gisom diti blog Mogoron Kimaragang momosik om powaa dit pomusaraan tokou popatog dit boros kimaragang. Iri poh katamanan ku, minsan ko aso tantu tuturan siti diti, mosomok noh sontoon nopudali iti blog kabarasan. Iti noh dogima ot wookon nagaagampot ku dit toon 2009.

Pagka manau-panau tokou noh diri sid toon 2010, potilombuso tokou noh it gamaon dit amu nopupusan dit toon nakatalib. Kayow noh momudali dit awasi ot gamaon sid toon wagu diti. Ingkudikai tokou it koubasan dit maapalui, kendaraat, kopokoruol om kopidsalang dit posunduran tulun tokou mondaliw sid kowosian.

Ponong sid kosuruton dit boros tokou kimaragang, isai it erus poh gama momoros, ponundan noh dit sukod wagu. It sukod wagu dit kaarati noh mokinongow, umbal kow noh momoros. Orubat tokou dot kimaragang kabarasan, nga otonusan om opunsaan dit boros kondiri.

Tupono: Kopiwosian toon wagu 2010 sogina dit susumombol siti. Tandayai tokou noh tumalib diti toon wagu.