Kopiwosian Tadau Krismas.

Moleeng obpinee om kinoruangan kikiawi, oruai noh banar korikatan dit 25-12-09, tadau tagayo dot Kristian.

Pagka tu, iti noh dogon dot koosipan, manganu oku kosiwatan manaak dot boros “Kopiwosian Tadau Krismas” kuma sid kikiawi it MANGASIP.

Mogot ong iti Krismas biano, sumurut it koosipan om kogompi tokou dot pisasamadan om piondusan sid kinoruangan kikiawi.

Tupono: Gompiyo tokou noh it samod om pitoluadan maya sid koosipan natanud tokou.

Amu Nakadasan.

Pogulu poh, kotoluadan sid dikoo it kakali mangakap diti blog ku. Onibak om alambat diri mimbulai tuturan wagu siti. Iri nogi, mokimaap tu mompod kou dati diri dot tuturan wagu siti nga iti noh boh maya i dot kosiwatan iti manaak dot tuturan.

Tuturan biano diti iri noh it naajajangan kodori mongindakod dot lansat. Koubasan dit gulu, it tongo kowaan sid timbaan mangan mari dot sanganu agkasai dot rugi. Potodokon nogi ot tonduk (kayu linowisan) sid saaw dit puun dot kowaan. Ong it mula, kiwaro mari ot duwaan dit tonduk. Iri nogi isai-isai it obongol mongindakod dit kowaan it notondukan, kuposon kabarasan ot pipangan ong ontok dot tonduk.

Milimpanau okoi dit gulu om katalib sid ropuw dot kowaan, nah mongimpuros okoi dino it nendakod noh ot lansat. Iri noh koobasan mari ong nendakod noh, iduan noh dot tonduk. Minsanko nendakod noh, waro poh sabat-sabat ot tuwa oogol, tu kakaalu it tuwa nokotoori.

Insan tadau minongindakod oku dot lansat. Sid sawat poh orongow ku noh ot maras-karas tulun mamanau tumoronong. Modtui madaada dino boh sid sawat dit lansat om monoyinu isai ot rumikot. Amu oku kotutun dit tulun rinumikot. Morosi nga waro sid ginawoku tu sid sawat oku dot lansat. Minsan poh mah dot nendakod noh it lansat nindakod ku.

Mongindad oku dot nunu dino ot maan dit tulun nokorikot siri. Emot ku noh it tulun tumoronong sid iso ot puun dot lansat dit kitonduk om asapow poh it tuwa. Uyadai dialo dot tonduk om togkos dot rugi it lansat. Anta noh it tulun mongindakod dit lansat yoh. Milo poh om “tuuuuuut!” kah norongow ku dot nokoontut it tulun.

Ades oruol it tiyan ku managka dot tirak tu kerarakan it bubuatan. Amu ku beno nakadasan, “ha..ha..ha..ha..ha..” kangku nokokalakak sid sawat dot lansat. Om indoo oku noh. Nunu poh gima’awat dit tutulun, nosusulang mongindakod dit lansat yoh.

Kalaga oku id siba, musum kusum oku om morosi i sid ginawo. “Disai dot lansat ilo nindakod ku, mokimaap ong dikau noh.” kangku mogolimbabaa poh. “Amui monguro boh, do kuwo toboh ino, nga nendakod noh daalo ino. Ba aman, mongindad poh boh, onuwan ku ika diti lansat ku.” kakah dit tulun sambil polosok dit nomomoluan dati iri. Nga amu oku noh minokianu, “eduan koh poh.” kangku diri, om lombus oku noh mamanau.

Tupono: Waro i ot kouyab ot ajajangan tokou mari diti sid koposiyon, awasi ondomon sera waro kolunguyan dot ginawo.